काठमाडौं- डडेलधुराको परशुराम नगरपालिकाका प्रमुख प्रशासकीय अधिकृतमाथि कुटपिट गरेको आरोपमा उपप्रमुखसहित दुई वडाध्यक्ष पक्राउ परेका छन्।
नगरपालिकाको कार्यपालिका बैठकमा प्रमुख प्रशासकीय अधिकृतमाथि कुटपिट गरेको आरोपमा उनीहरू पक्राउ परेका हुन्।
प्रमुख प्रशासकीय अधिकृत कृष्णदेव जोशीमाथि कुटपिट गरेको आरोपमा नगरपालिकाका उपप्रमुख विमलाकुमारी बोहरा, वडा नम्बर ७ का वडाध्यक्ष कर्णबबहादुर धामी र वडा नम्बर १ का वडाध्यक्ष लालबहादुर धामीलाई प्रहरीले पक्राउ गरेको हो।
बिहीबार कार्यपालिका बैठक चलिरहेका बेला विवाद उत्पन्न हुँदा उनीहरूले प्रमुख प्रशासकीय अधिकृत जोशीलाई कुटपिट गरेको आरोप छ।
जिल्ला प्रहरी कार्यालय डडेल्धुराका प्रहरी नायब उपरीक्षक दीपक कार्कीले कुटपिट गरेको आरोपमा पक्राउ परेका तीनै जना जनप्रतिनिधिलाई पक्राउ गरी थप अनुसन्धान भइरहेको बताएका छन्।
माओवादी केन्द्रबाट निर्वाचित जनप्रतिनिधिले शाखा अधिकृत लक्ष्मी विष्टको काज फिर्ता गर्न माग गर्दा प्रमुख प्रशासकीय अधिकृत जोशीले आफूले गर्न नसक्ने बताएपछि कुटपिट भएको बताइएको छ।
यही विषयमा आक्रोशित भएका कार्यपालिका सदस्यहरूले हलमा कुर्सी तोडफोड गर्दै जोशीमाथि कुटपिट गरेका थिए।
कुटपिटबाट घाइते भएका जोशीको टाउकोमा तीनवटा टाका लागेको छ।
घटनापछि आन्दोलित भएका कर्मचारीहरू दोषीमाथि कारबाहीको माग गरेका छन्।
Leave a Reply