जनकपुरधाम- जनकपुरधाममा ई–रिक्सा सञ्चालनलाई व्यवस्थित बनाउन निश्चित स्ट्यान्ड तोकिएको छ।
अव्यवस्थित बन्दै गएको ई–रिक्सालाई व्यवस्थित बनाउने उद्देश्यका साथ धनुषा ट्राफिक र जनकपुरधाम उपमहानगरपालिकाको समन्वय एवं सहकार्यमा स्ट्यान्ड तोकिएको हो।
तत्कालका लागि जानकी मन्दिर, रामानन्द चोक र पिडाडाी चोकमा ई–रिक्साका लागि स्ट्यान्ड निर्धारण गरिएको जिल्ला ट्राफिक प्रहरी कार्यालय धनुषाले जनाएको छ।
जानकी मन्दिर क्षेत्रमा ई–रिक्सा स्ट्यान्डका लागि अरगजा पोखरीको पूर्वपट्टीको स्थान तोकिएको छ।
त्यस्तै रामानन्द चोकमा सडकको पूर्वउत्तर छेउ र पिडाडी चोकमा गोरधुवा पोखरीको छेउमा ई–रिक्सा स्ट्यान्ड निर्धारण गरिएको ट्राफिकले जनाएको छ।
यसबाहेक नगर क्षेत्रभित्र थप २५ ठाउँमा ई–रिक्सा स्ट्यान्ड व्यवस्थापन गर्ने योजनाका साथ काम भइरहेको जिल्ला ट्राफिक प्रहरीले जनाएको छ।
ई–रिक्सा चालकहरूले तोकिएका स्ट्यान्डबाट मात्र यात्रु चढाउन र ओराल्न पाउन ट्राफिक प्रहरीले जनाएको छ।
जनकपुरधाम नगर क्षेत्रभित्र अवागमनका लागि सहज साधनका रूपमा ई–रिक्सा प्रयोग भइरहे पनि व्यवस्थित हुन नसक्दा ट्राफिकको अत्याधिक समस्या देखिएको छ।
कतिपय ई–रिक्साहरू अनुमति नै नलिइ सञ्चालनमा रहेका छन् भने चालकहरूले पनि सबारी चालक अनुमति पत्र नलिएको बताइएको छ।
एक अनुमानका अनुसार जनकपुरधाम नगरपालिका क्षेत्रभित्रमात्रै हजारभन्दा बढी ई–रिक्साहरू सञ्चालनमा रहेका छन्।
Leave a Reply