विराटनगर स्टाफ नर्स हत्या : प्रेमीमाथि आशंका

जनकपुरधाम- विराटनगरमा डेरको घरमा शव फेला परेकी स्टाफ नर्सको हत्या उनकै प्रेमीले गरेको आशंका गरिएकोे छ।

यद्यपि प्रहरीले यसको पुष्टि गरिसकेको छैन। घटनाको सत्यतथ्य पत्ता लगाउन प्रहरी अनुसन्धानमा जुटेको छ।

सिरहा फुल्काहाकट्टी घर भइ विराटनगर महानगरपालिका–४ मा डेरा गरेर बस्दै आएकी २२ वर्षीया चन्द्रिकाकुमारी दासको शव शुक्रबार मध्याह्नतिर फेला परेको थियो।

मोरङ प्रहरी प्रवक्ता डिएसपी रन्जकुमार दाहालका अनुसार दास नोबेल शिक्षण अस्पतालमा कार्यरत थिइन्।
डेरा बसेको घरको कोठाभित्रको शौचालयमा शव फेला परेको दाहालले बताए।

उनका अनुसार धारिलो हतियार प्रहार गरेर हत्या गरेपछि फालेको अवस्थामा शव भेटिएको हो।

दासको घाँटी, अनुहारलायत शरीरका विभिन्न भागमा धारिलो हतियारले प्रहार गरिएको छ।

शौचालयमा शव फालेर कोठाको चाबी बाहिरबाट लगाइ हत्यामा संलग्न व्यक्ति फरार भएको प्रहरीको भनाइ छ।

घटनापछि दासका प्रेमी भनिएका युवा सम्पर्कविहीन भएको प्रहरीले बताएकोे छ।

दासका साथीहरूले प्रहरीलाई दिएको जानकारीअनुसार उनी गाउँकै अमिन धानुक भन्नेसँग प्रेम सम्बन्धमा थिइन्।

सिरहाको गोलबजारमा काम गर्दै आइरहेका धानुक पेसाले अहेब रहेको प्रहरीले जनाएको छ।

सम्पर्कविहीन भएपछि दासको हत्यामा धानुक संलग्न भएको हुनसक्ने प्रहरीको अनुमान छ। तर, उनी विराटनगर कहिले आएका थिए भन्ने यकिन भइसकेको छैन।

मृतक बसेकै घरमा उनका अरू साथीहरू पनि डेरा गरेर बस्दै आएका छन्।

तीमध्ये एक जनाको व्हाट्सएपमा ‘मैले हत्या गरेर शौचालयमा छाडिदिएको छु’ भन्दै म्यासेज र फोटोहरू पाइएको प्रहरी स्रोतले जनाएको छ।

ह्वाट्सएपमा म्यासेज आएपछि मृतककी साथीले घरपेटीलाई जानकारी गराएकी थिइन्।

घरपेटीले प्रहरीलाई खबर गरेपछि प्रहरी पुग्दा दासको शव भेटिएको थियो।

प्रहरीले घटनाको विभिन्न कोणबाट अनुसन्धान गरिरहेको छ। हालसम्म प्रहरीले यो घटनामा कसैलाई पक्राउ गरेको छैन।

 

 

 

SHARINGS

Leave a Reply

Your email address will not be published. Required fields are marked *