जनकपुरधाम- १५ दिने मिथिला मध्यमा परिक्रमा बिहीबार महोत्तरीको जलेश्वर पुगेको छ।
सोमबार जनकपुरधामबाट सुरू भएको परिक्रमा भारतको कलाणेश्वर र गिरिजास्थान हुँदै जलेश्वर पुगेको हो।
गिरिजास्थानबाट मटिहानी पुगेका परिक्रमाका श्रद्धालुहरू बुधबार त्यहाँ विश्राम गरेका थिए।
१५ दिने मिथिला मध्यमा परिक्रमालाई सबैभन्दा लामो धार्मिक यात्राको रूपमा समेत लिइन्छ।
जनकपुरधामलाई केन्द्रमा राखेर नेपाल तथा भारतका विभिन्न स्थानहुँदै चारतिरबाट परिक्रमा गरिने हुनाले मिथिला मध्यमा परिक्रमाको विशेष धार्मिक महत्व रहेको छ।
परिक्रमामा हरेक वर्षझैं यस वर्ष पनि नेपाल तथा भारतका लाखौं श्रद्धालु सहभागी भएका छन्।
मिथिला मध्यमा परिक्रमाको विशेष धार्मिक महत्व भए पनि श्रद्धालुहरू पैदल यात्रा गर्ने परिक्रमा सडक स्तरोन्नति हुन नसक्दा कठिनाइ भोग्नुपरिेको श्रद्धालुहरूको गुनासो छ।
निजीस्तरबाट विभिन्न युवा क्लब तथा संघसंस्थाहरूले निःशुल्क वास, खाना, पानी, स्वास्थ्य शिविरलगायतको व्यवस्था गरे पनि सरकारले चासो नदेखाएको उनीहरूको भनाइ छ।
१५ दिनसम्म चल्ने यो धार्मिक यात्रा जलेश्वरबाट मडई, ध्रुवकुण्ड, कञ्चनवन, धनुषाको पर्वता, धनुषाधाम, सतोखर र औरही पुग्नेछ।
औरहीबाट पुनः भारतको करूणा, विसौल हुँदै १४ औं दिन जनकपुरधाम पुग्नेछ। फागु पुर्णिमाका दिन जनकपुरधामको अन्तगृह परिक्रमा गरेपछि यो धार्मिक यात्रा समापन हुनेछ।
अन्तगृह परिक्रमाको भोलिपल्ट जनकपुर आसपासको क्षेत्रमा होली पर्व मनाउने परम्परा रहेको छ।
परिक्रमाका श्रद्धालुहरूनेपाल तथा भारतसहित कुल १३३ किलोमिटर दूरीको पैदल यात्रा गर्ने गर्दछन्।
Leave a Reply